Ua faailoa mai nei e le Matagaluega o Faamaumauga a le Malo na oo i le 168,000 le aofai o tagata ua leai ni galuega i le faaiuga o le masina o Tesema 2009.

Faatoa toe o’o lea o le fuainumera o tagata ua leai ni galuega i lea maualuga talu mai le tausaga 1993.  Ua pito i sili foi ona maualuga le fuainumera o le autalavou i le va o le 15-24 tausaga le matutua ua leai ni galuega ma ua o’o ai nei i le 18.4%.  Ua toe faaopoopoina le fuainumera o tagata Pasefika ua leai ni galuega ma ua oo ai nei i le 14 pasene le maualuga talu mai le 7.8 pasene sa iai i le tausaga 2008.

O le matou lava taofi ua taunuu le maualuga o le fuainumera o tagata ua leai ni galuega ua iai nei, ona ose faiga mautinoa lava a le Malo a le National.  E leai lava so latou gaioiga o faia e puipui ai tagata faigaluega e pei ona taumafai iai le Malo a Ausetalia ma Amerika io latou faigamalo.

Ua leai lava se gaioiga a le Malo a John Key e taumafai ai ia faaitiitia le fuainumera o tagata e leai ni galuega ona o se faiga fa’a’au’au lea mo le aufaipisinisi ma kamupani tetele.

Aua afai e toatele le fuainumera o tagata ua leai ni galuega o le a faapena ona faigofie ona taumafai kamupani ma pisinisi tetele ia faapa’u totogi a le aufaigaluega.

O le mafuaaga foi lena nao le 25 sene ua toe faaopoopo i le totogi maualalo faatapulaia mo tagata faigaluega.  O le aso 1 o Aperila o lenei tausaga e amata ai le faamamaluina o le totogi maualalo faatapulaia i le $12.75 i le itula.  O faiga fa’a’au’au lava ia a le Malo e puipui ai kamupani ma pisinisi tetele.

O le fesili, e faapefea ona tausi se aiga ise galuega o loo totogiina le $12.75 i le itula, poo le $510 i le vaiaso, poo le $26,520 i le tausaga?  Faimai leisi toeaina o le matou aiga i Samoa, oka oka le tele o lena tupe i le tausaga ma mo’omo’o mai e fia maua se galuega e totogi faapena.  Ao le faalavelave afai o le tupe lea o loo e taumafai iai e tausi ai lou aiga i Niu Sila lava, e toesea muamua lava lafoga a le Malo, totoe ai nao le $426 i le vaiaso e mafai ona faaaoga i le totogiina o mea e tatau ona faamuamua aua le tausiga o le aiga.  Ona sosoo lea o le toesea o le totogi o le fale, pili o moli, pili o le vai, pili o le telefoni, totogi o le penisini e fealuai ai i le galuega. 

Afai o le totogi o le fale e $300 i le vaiaso ua tele le faaletonu i isi pili e tatau ona totogi.  Ao lenei foi e lei oo le faasoasoa i meaai o le vaiaso, o lunch a tamaiti aoga ma latou pasese i le pasi, faapea isi pili o aoga.

E le gata i lea o aiga Samoa foi o loo iai isi vaega e faaalu ai tupe e pei o le teutusi a le faifeau, faapea foi faalavelave faa Samoa e le mafai ona alo’ese ai.

O le totogi maualao faatapulaa ua iai nei a le Malo, e le’o se totogi talafeagai mo le tausiga o le tagata faigaluega ma lona aiga, ae maise le aiga Samoa.  O le mafuaaga lea ua ou lagolagoina ai ma le malosi le mau ia sii le totogi maualalo faatapulaia i le $15 i le itula.

E le gata i lea ou te lagolagoina ai le mau ia maua avanoa aoga mo tagata matutua ma toe faaopoopoina isi tupe mo avanoa aoga a le fanau aua ou te talitonu a maualuga o latou faailoga ma tomai faapitoa e maua, o le a faapena foi ona maualuga o latou totogi e tatau ona maua ma lelei galuega e galulue ai.

Afai e leai ni faiga faapenei a le Malo, ma leai foi se agaga finau a tatou lava aiga, o lona uiga ose olaga mativa ma le pologa o le a feagai ma latou ia, ma e le’o se olaga lea e tatau ona tatou talia.

Ou te talitonu foi, e le mafai ona tatou maua ni suiga lelei pe afai tatou te punonou ma moeiigi e aunoa ma le sailiili ma malamalama i mataupu ma faaiuga faalemalo ma mea o loo tutupu i lenei atunuu.

E masani ona ou vaai o pu’e mai ata a le Palemia ma nisi o tupulaga Pasefika.  E fiafia tele iai o tatou tupulaga aua o se tagata e mata ataata gofie ma ose tagata e tele ana tupe. O’u manatu lea o lea se lagona o nei tupulaga pe afai latou te malamalama o loo faatino e lana malo ni faiga e aafaina tele latou ma o latou aiga i le lumanai? 

Ua tatau ona manino lelei o le matua aafia o tatou aiga i faiga faavae a lenei faiga-Malo, ma e aliali ai foi e le’o faatauaina o tatou tagata e lenei palemia.