O le aso Sa, le aso 24 o Ianuari, na mätou malaga faapitoa ai ma le taitai o le Leipa, le afioga ia Lilomaiava Phil Goff, e feiloai ma Maori i Wanganui e faamanatu le aso fanau o le Perofeta Maori o Tahupotiki Wiremu Ratana.  O lenei Perofeta Maori na ia faavaeina se ekalesia mo Maori uma i Niu Sila, ma ia faavaeina le aai o Ratana i Wanganui ile tausaga 1918.

O le tausaga 1936 na osi ai se feagaiga ile va o le Ekalesia Ratana ma le vaega faaupufai o le Leipa ma aloaia ai le avea o sui o Ratana e fai ma sui faipule Maori mo le vaega o le Leipa i faiga palota mai lea tausaga i lea tausaga seia oo mai lava ile aso.

O tausaga uma ile masina o Ianuari e faamanatu ai le aso fanau o le perofeta na faavaeina lenei ekalesia, ma o tausaga uma e malaga ai le taitai o le Leipa e toe faamanatu le feagaiga ua osi ma faatalatalanoa mataupu taua o loo manaomia ai le fesoasoani mo Maori.

O lenei tausaga e tele mataupu o loo nofo popole iai Maori ona o le faaletonu o le tamaoaiga i Niu Sila.   Ou te talitonu foi o mataupu o loo popole iai Maori, o mataupu foi ia e ao ona tatou nofo malamalama iai.

Muamua, o lenei ua faailoa mai se lipoti a le Malo faapea ua tatau ona toe faatulaga lafoga totogi mo le aufaipisinisi ma le aufaigaluega, faapea lafoga totogi mo fale ma fanua.

O le finagalo a le Malo ia faapau lafoga mo le aufaipisinisi mai le 38 sene ile tala i lalo ile 30 sene ile tala.  E le gata ilea o loo faapea mai foi ia sii le lafoga mo oloa ma auaunaga (poo le GST) mai le 12.5 pasene o loo iai nei ia oo ile 15%.  Ae o loo iai le fuafuaga ia toe faavae seisi lafoga fou e totogi mo latou o loo iai fale ma fanua.

O fuafuaga ia a le Malo e manino ai lava lona faaauau lava i le aufaipisinisi ma kamupani tetele.  E le popole lava i tagata faigaluega ma le aufaipisinisi laiti, ae e ave lava le faamuamua i kamupani tetele, aua o latou paaga ia.  O le mafuaaga lea o loo iai sui o nisi o ia kamupani tetele e pei o Ernst & Young, PriceWaterhouse Coopers, Deloitte, Gareth Young Investments Ltd, Chapman Tripp, NZ Stock Exchange Ltd, ma isi lava tagata ile komiti faapitoa sa iloiloga lafoga ma fautuaina le Malo i suiga e tatau ona iai.

O lea foi ua aumai tonu latou fautuaga e faapau lafoga mo le aufaipisinisi ma kamupani, ae sii lafoga e pei o le GST ile 15% mo le lautele o tagata.  O lona uiga e amo e tagata e vaivai le tamaoaiga le mamafa o le avega o le totogiina o lafoga, aua soo se taimi e fai ai sau faatau, e te totogiina le 15% faaopoopo ile tau o oloa. 

O leisi mataupu, o le mataupu faatatau ile leai o ni galuega mo le tausiga o aiga. Ou te talitonu sa maimoa le atunuu i ata o le TV sa faasalalau ai le silia ma le 3000 o tagata i Manukau sa taumafai ia maua se avanoa e faigaluega ai, ae nao le 150 avanoa faigaluega.  Ao ia foi galuega, o galuega e maualalo lava totogi.

O lenei ua fesili tagata o le ekalesia Ratana, o lea le mea ua le gaioi ai le faigamalo ina ia fofo le faaletonu o loo iai nei galuega? 

O lenei ua toe faaopoopo leisi 66,000 tagata e leai ni galuega i le va o le masina o Novema ma Tesema 2009, ae pau lava suiga o loo fuafuaina nei e le Malo o le faapa’u o lafoga mo le aufaipisinisi.

O le toatele o tagata o loo aafia ile aofai o tagata e leai ni galuega o tagata Maori ma tagata Pasefika e pei ona tatou matamata atu i faasalalauga o le TV.  O Tesema o le 2009 na silia ai ma le 150,000 le aofai o tagata e leai ni galuega, ae o loo faaataata mai foi e le Malo fuafuaga ina ia faapau le aofai o tagata e ola i penefiti a le Malo.

O le ata lenei ua aliali mai mo Maori ma tagata Pasefika i faiga a lenei Malo, o le a atili sii foi lafoga mo le aufaigaluega, sii lafoga o le GST, ma atili faaopoopo le fuainumera o tagata e leai ni galuega.

O le uiga o nei faiga, o le a atili pologa pea tagata e vaivai le tamaoaiga, ae atili faaopoopo pea tupe mo latou o loo maua mea.

Faimai nisi o Ratana na palota mo le faigamalo ile 2008, ua lagona lava le latou sese, ae paga lea faatoa talitonu.  O lea la ua toe faamausali le feagaiga a Ratana ma le vaega a le Leipa mo leisi faigapalota.

Ends.