Ua faailoa mai e le Minisita o Mataupu tau Tagata Maori faapea ua toe aliali foi i luga le faatauina o laisene avetaavale a se vaega tutoatasi a Maori ma o loo faatauina e tagata Pasefika. 

Ua faailoa mai e lenei minisita o nei laisene avetaavale e le’o ni laisene e talia e le Malo.  E le aloaia e le matagaluega o leoleo ma faamasinoga. Afai lava e maua oe ese leoleo o e faaaogaina lenei laisene avetaavale e mafai ona molia oe ile tulafono, i le faaogaina ose laisene pepelo, poo le taumafai e faasese le ofisa o leoleo.

E lagona ai lava le faanoanoa i lenei lava mataupu, aua e leo se taimi muamua lea ua tupu ai.  E le gata sa faatau muamua foi nei laisene e nei vaega Maori o loo finau mo le latou tutoatasi, ae sa faapea foi ona faatau tusifolau pepelo ile $500 ile tusi folau.  E faimai lava latou e talitonu lava e maua ai e latou o loo ovasitaia le avanoa mo le nofomau, ae e mulimuliane lava e le talia pe aloaia e le matagaluega a le Malo.

Ou te leiloa pe aisea le mea e faigofie ai tele ona faasese o tatou tagata e nei faalapotopotoga taufaasese, ma maimau ai lava latou tupe, ae mulimuliane e le sao ia faiga?  Ose tulaga mataga tele ma ose luma ise atunuu le tupu soo o nei faiga, ma taufaasese soo tatou tagata, ma maimau ai lava le tele o tupe. 

O loo aliali ai se tasi o mafuaaga o le faigofie ona taufaasese o tatou tagata i nei faiga, ona ua foliga mai, o le naunau o tatou tagata e saili auala faigofie, poo auala piopio.

E le gata foi i lea, ae o loo tupu pea le mea lea o le sulu atu o le tagata e fia maua se fesoasoani ma faimai ua totogi le fia selau tala ise tagata e faia o latou pepa nofomau, ae emo ifo le ata, ua faaaoga le tupe e le consultant lea, ua leiloa le tusifolau, ma e leai se talosaga ua faia. 

O le fesili muamua lava a le matagaluega o femalagaiga, e mafai ona faamaonia lea tulaga?  O iai se lisiti sa e totogiina lea tupe i lea consultant?  O le tali a le toatele, e leai ni lisiti.  Poo le faapea mai foi ua leiloa.

O le lisiti e faamaonia ai pe sa e totogiina se tupe i seisi pe leai.  Afai e leai se lisiti o loo ia te oe, ua e faatamala, ma tusa lava poo oe ose tagata faamaoni, e le taitai lava talitonuina oe e latou o loo faia le faaiuga o lau talosaga.

Soo se taimi lava e te totogiina ai se tupe ise ofisa o seisi o loo faia lau talosaga mo se visa poo se nofomau, ia e fesili mo se lisiti o lau tupe.  E le gata i lea, afai e maua mai le lisiti ia e silasila lelei iai poo sao le aofai o le tupe o loo tusia ile lisiti.  Ia e silasila foi iai poo sao le igoa o le pisinisi ma le tuatusi o le pisinisi lea ua e totogiina iai le tupe o loo faamau ile lisiti.  Aua a mulimuliane tulai se vevesi, e taua tele le sao o ia mea, e avea ma pine mausali i lou faamaoni pe leai.

O loo faaauau pea e Ofisa a soo se faipule le galulue e aunoa ma se totogi mo le fesoasoani mo soo se mataupu e te manaomia ai le fesoasoani.  E maua foi le avanoa e fesoasoani ai Ofisa o faipule mo latou o loo sulu atu mo le apiliina o se faaiuga a le Ofisa a le Malo.  Peitai ane, mo le silafia e le mamalu o le tatou aufaitau, o le taimi nei ua tele lava le suiga ua iai ile Minisita o Femalagaaiga o loo gafa ma talosaga, ma lana faaiuga ua faia mo ia talosaga.  Ua faigata.  Ua leai lava se talosaga ua faigofie, ua matua su’esu’e lava talosaga taitasi, ma o le tele lava o taimi o loo teena e le faigamalo talsoaga o le tele o aiga.

Ou te fautuaina ai le mamalu o le atunuu, afai o loo iai sau mataupu o loo mamafa i lou finagalo, ae maise ose mataupu tau femalagaaiga, ia vave faafesootai le matagaluega o loo gafa ma lau mataupu, poo le faafesootai vave o le Ofisa o lau faipule.

Ua matua e faatamala tele pe afai faatoa e saili lava le fesoasooani ile taimi mulimuli ua pito i sili ona faigata ai ona maua le fesoasoani o loo e manaomia.
 
Ends.