Ua fa’ailoa mai nei e le alii Palemia o John Key ni suiga mata’utia o le a iai mo tagata faigaluega uma i Niu Sila i lana saunoaga autu i le fonotaga faaletausaga a le vaega faaupufai a le National na faia i le aso Sa ua te’a, i le faletalimalo a le Sky City i Aukilani.

E lima ni vaega tetele ua fofola mai e le Palemia o le a suia i le tulafono o loo aiaia ai aia tatau a tagata faigaluega.

O le tulafono tuai sa iai, sa mafai ona tuli oe e se kamupani o loo e faigaluega ai, ae sa iai le avanoa e mafai ai e le tagata faigaluega ona ave sana tagi i le faamasinoga o galuega, poo le matagaluega a le Leipa e faasaga i le kamupani ona o le tuliina o oe.

Peitai ina ua tulai mai le faigamalo a John Key na faalauaiteleina ai lana tulafono e mafai ai ona faamutaina galuega a se tagata faatoa amata ise galuega i le 90 aso talu ona faigaluega e aunoa ma se faamatalaga poo se mafuaaga tatau.   O lea tulafono na pasia e le faigamalo a John Key ia Tesema 2008 e aofia ai nao kamupani laiti e le silia ma le 20 tagata faigaluega o loo faafaigaluegaina. 

A’o teuteuga fou ua fuafuaina nei e teuteu ai lea lava tulafono, o le a afaina ai tagata faigaluega uma i soo se fale faigaluega, i soo se kamupani ma i soo se pisinisi, pe laiti pe tele foi, ua le toe faatuaoiina.

O lona uiga o le a teuteu le tulafono e le National ina ia faafaigofie ona fa’ate’a pe tuli se tagata faigaluega ua amata se galuega fou i totonu o le 90 aso muamua e faigaluega ai. 

E mafai ona fa’ate’a oe, e aunoa ma ni mafuaaga tatau, ua le toe iai foi se puipuiga mo le tagata faigaluega mai le matagaluega o Leipa, sa masani ona sulu iai pe afai ua afaina galuega ona o ni faaiuga le talafeagai a pulega o galuega.

O lona lua o suiga ua saunoa nei iai John Key, o le a le toe faafaigofie ona faaulu se tagi a se tagata faigaluega i le faamasinoga o galuega e faasaga ise pulega o se kamupani. 

O le a mafai foi ona faasala e se kamupani le faamasinoga o galuega pe a tuai, pe umi foi se taimi o faatalitali lea kamupani mo se faaiuga a le faamasinoga ise feeseeseaiga i le va o lea kamupani ma se tagata faigaluega lea na faaulu sana tagi.

O le a le mafai foi ona toe su’esu’eina, fesiligia pe tua’ia se kamupani ona o le sese o ala na uia i le lapataiga poo le faate’aina o se tagata faigaluega. 

O lona tolu o suiga a le Malo a John Key, o le a le toe faigofie ona maua le avanoa a sui o Iuni a tagata faigaluega e mafai ai ona ulufale i totonu o kamupani. 

E tatau i soo se Iuni ona fai muamua le talosaga mo oe e faataga mai e le pulega a se kamupani faatoa mafai lea ona ulufale i totonu o lea kamupani e asia tagata faigaluega o loo avea oni sui o le Iuni.

O leisi suiga fou o le a iai ua faaalia mai e John Key, o le a mafai ona faafesootai sao e pulega o kamupani le aufaigaluega i taimi o feutagaiga ma Iuni faatatau i siitaga o totogi ma le feutagaiga o tulaga uma o galuega. 

Sa masani o le tiute lava lea o le Iuni, o le logoina o le aufaigaluega e uiga i feutagaiga o loo feagai ai iuni ma le pulega o kamupani, aua le puipuiga o le aufaigaluega mai uiga tau faamatau a pule o kamupani,  ao lea ua aveeseina e John Key lea aia tatau, ae ua ia tatala le avanoa i le pulega e talanoa sao ai i tagata faigaluega i taimi o feutanaiga.

O le vaega mulimuli o fesuiaiga o tulafono tau galuega, e faatatau i Aso Malolo Faaletulafono (Holiday’s Act).  O le a iai fesuiaiga mo le fuafuaina o totogi mo aso malolo a le aufaigaluega o loo faigaluega ini galuega e le tumau (casual worker). 

E le gata i lea, o le a iai le teuteuga o le tulafono o aso malolo faaletulafono e mafai ai ona faatau e le tagata faigaluega i le pule o le kamupani se vaiaso e tasi mai vaiaso malolo o loo iai nei.

Mo i latou o loo faapea ifo e lelei le faatau o aso malolo i le pulega, ia tou mautinoa, o le toatele o le aufaigaluega e faatau atu aso malolo, o le a faigofie ai loa i le Malo ona faaitiitia aso malolo faaletausaga ua faatulafonoina, aua ua le faaaogaina aso malolo e malolo ai mai galuega e pei sa fuafua iai le faigamalo a le Leipa ua tuanai atu nei.

O suiga uma nei e manuia ai lava kamupani ma pisinisi tetele, ae afaina ai lava le aufaigaluega.

Ends.